martes, 19 de diciembre de 2017

La independencia televisiva



En metá de la campaña pa unes elecciones autonómiques más importantes de la historia d'España -y depués de meses ensin escribir-, vuelvo actualizar el blog pa falar de Cataluña; de Cataluña y el so reconocimientu internacional como nación. Sicasí, nesta páxina, y como nun podía ser d'otra manera, vamos facer referencia al reconocimientu internacional de la so televisión. Y ye que si un país nun ye un estáu de derechu plenu hasta que ye reconocíu pola ONU y pue principiar a facer coses como participar nos Xuegos Olímpicos, cola televisión pasa lo mesmo al traviés de la so entrada na Unión Europea de Radifusión y la so participación n'Eurovisión.

Los primeros intentos de la televisión catalana (TV3) de ser reconocida a nivel européu son de 1986, añu nel que la UER utilizó la so señal pa la retresmisión del partíu de Copa d’Europa ente’l Barcelona y la Juventus de Turín. Asina, la rede europea de televisiones publiques nun fixo casu a les peticiones del Gobiernu español -que recordó que TV3 nun formaba parte del organismu-, dalgo que s’entendió como un reconocimientu a nivel internacional pa la canal catalana.

Per otru llau, nel 2004, Andorra Televisió (ATV), como miembru de derechu plenu de la UER, anunció que diba participar pela primer vez nel Festival de la Canción d’Eurovisión, dalgo que permitió que’l catalán pudiera sentise nel festival 35 años depués de que TVE apartara a Joan Manuel Serrat del festival por querer interpretar “La, la, la” na so llingua. El problema con TVE vieno porque ATV nun tenía medios abondo pa sufragar la participación, polo que la cadena decidió pidir la collaboración de l’autonómica de Cataluña pa la producción d'una preselección que tamien diba emitise per TV3 y onde los catalanes diben poder votar.



El programa vióse por dalgún mediu de comunicación español y por dellos directivos de TVE como una intromisión de Cataluña nel festival, un concursu que-y da a la pública española ún de los meyores datos d’audiencia del añu y qu’a nivel mundial axunta hasta 600 millones d’espectadores. Mesmamente, nos meses anteriores al festival, especulóse con que TVE nun diba emitir la semifinal onde participaba Andorra y tampoco nun-y diba ceder a la emisora catalana la señal, polo que TV3 anunció la busca de midíes alternatives pa que los sos espectadores pudieran ver a Marta Roure interpretando Jugarem a estimar-nos, la primer composición en catalán nel concursu musical con más audiencia del mundu. Al final, un cambiu nel Gobiernu español y na dirección de TVE confirmó la emisión de la semifinal al traviés de La 2.

Otra manera, nel 2009, Catalunya Música convirtióse en participante autorizáu de la UER, un alcuerdu históricu que-y permite a la emisora retresmitir conciertos de primer orde mundial. Anque les condiciones d’emisora rexonal impidíeron-y ser miembru activu –cola posibilidá d’acceder a la rede d’Eurovisión y a les asamblees de la entidá-, l’organismu européu reconoció que l’actividá de Catalunya Música yera útil pa la UER. Amás, l’alcuerdu permite que les producciones musicales catalanes tengan proyección acullá del ámbitu llingüísticu.

Per otru llau, a iniciativa d'ERC, el Congresu de los Diputaos aprobó nel 2006, col apoyu de PP y PSOE, una Proposición non de Llei que debía de permitir la entrada, como miembros activos de la UER, de les corporaciones autonómiques de radio y televisión del Estáu español que-ylo solicitaren a TVE. Otra manera, depués del últimu cambiu de los estatutos de la UER, en xunu del 2013, la emisora catalana cumpliría'l requisitu clave pa xunise a la organización europea como un miembru de derechu plenu: TV3 trátase d'una “corporación nacional" d'alcuerdu col artículu 3.4 “porque cubre un área llingüística propia nun Estáu plurillingüísticu”.



Asina, por exemplu, S4, la pública del País de Gales, ye miembru de derechu plenu de la UER dende 1982, col preste de la pública británica BBC. Y ye que Reinu Uníu contempla que los sos territorios participen, por separáu, nos acontecimientos deportivos y, dende anguaño, n'eventos de la rede europea como 'El Coru d'Eurovisión', onde los galeses llevaron la medaya de plata al meyor grupu coral d'Europa nel 2017.

El diputáu catalán republicanu Joan Capdevila i Esteve pidió l'ingresu de TV3 nel organismu internacional al presidente de RTVE, José Antonio Sánchez Domínguez, na comisión de control de la pública estatal d'abril d'anguaño. Sicasí, el dirixente de la cadena públicu indicó que la UER refugara la entrada en febreru de 2016 al traviés del so Comité de Televisión -onde España ocupaba la siya de la vicepresidencia-, amás de pola so condición de televisión rexonal y por un informe desfavorable unviáu pola mesma RTVE.

De llegar a implementase la República catalana -y nun tener que depender del preste de la televisión española-, esti Estáu nuevu necesitaria d'un reconocimientu dafechu de la comunidá internacional al traviés de la ONU y, depués d'esto, TV3 tendría que pertenecer a la Unión Internacional de Telecomunicaciones. Amas, el Grupu de Referencia de la UER, nel que nun participa España, sería l'órganu que decidiría sobre la entrada de Cataluña, anque l'Estáu español podría vetar el debú catalán n'Eurovisión al ser miembru del Big Five -ye dicir, un de los cinco países que más contribúi económicamente a la rede europea-.



Con too, ta la posibilidá d'una futura candidatura catalana nel certame al traviés d'Andorra. El país de los Pirineos nun participa n'Eurovisión dende 2009 pola so situación económica. Y ye que pa poder competir en condiciones faen falta un mínimu d'unos 300.000 euros y la corporación andorrana cuntaría con menos de la metá del presupuestu necesario pa concursar. Nesti casu, una Cataluña independiente podría ufrir lo necesario pa una candidatura conxunta. Con too, Cataluña tamién tendría que facese colos derechos d'emisión d'Eurovisión.

Esto nun parez un problema, porque la televisión pública de Kosovu (RTK) paga cada añu 2.350 euros a la UER (4,12 euro / minutu) pa emitir los trés espectáculos en directo. Too esto a pesar de que Kosovu nun pue participar n'Eurovisión porque nun pertenez a la UER -nun ye miembru del organismu européu al nun tar dientro de la Unión Internacional de Telecomunicaciones nin del Conseyu d'Europa-. 

Pel momentu, el Grupu de Referencia dio la so afirmación a la participación de Kosovu nel certame, pero cola condición que'l país anfitrión tenía que ser un país que reconociera la independencia de Kosovu. Portugal, que ye ún de los 111 países del mundu que reconoz esti país, entama'l festival nel 2018 y Kosovu yá tien un prefixu internacional propiu (+383) otorgáu pola Unión Internacional de Telecomunicaciones (UIT) -elementu fundamental que permitiría a los ciudadanos kosovares votar nel concursu de cantares-. Sicasí, la UER sigue refugando la so participación al nun ser un miembru de les Naciones Uníes.

miércoles, 22 de marzo de 2017

Rodrigo Cueva's around the world


Rodrigo Cuevas, amás del artista del momentu, ye un soplu d'aire frescu pa la cultura asturiana. Los sos sones y estétiques tradicionales amestaos con música electrónica y cabaret frañaron tolos esquemes y valtaron munches muries. Tanto que gracies al so trabayu y dende los ámbitos de la contracultura metió la identidá asturiana nos escenarios más mainstream -xira nueva presentada na Llaboral y, depués d'actuar en Madrid, parada próxima nel Niemeyer, edificios emblemes de la política cultural de la FSA-. Sicasí, l'artista uvieín nun ye un rara avis dientro de la escena sonora mundial. Asina, podemos ver dellos exemplos de cantares con petardéu del bonu enllenos de discursu reivindicativu -amás de qu'amesten cultura pop(ular tradicional) con cultura pop (globalizada)-.



El californianu AB Soto amesta na so música ritmos populares llatinos con pop, house y dance. Too ello pa burllase de los estereotipos sobre la cultura mexicana y la cultura LGTBI. Equí podemos velu nel so éxitu “Cha Cha Bitch”, tema billingüe onde aparez vestíu con versiones mui petardes de los traxes tradicionales mexicanos. Al traviés del humor, esti artista queer quier criticar la marxinalidá a la que la mesma comunidá gai somete a dalgunos de los sos miembros. Un bombazu que yá nun pue faltar nos sitios d'ambiente norteamericanos y que sonó hasta en RuPaul's Drag Race -que ye tanto como salir en Pieces pa un bablista que presenta'l so poemariu nuevu, pero en rollu marica y a nivel mundial-.



Arisa nun ye un cantante. Ye una fiesta de temática LGTBI que s'entama davezu en Tel Aviv. Pa promocionar esta actividá, l'artista Uriel Yekutiel protagoniza -en playback al meyor xeitu drag queen- dellos videos enllenos de cuerpos masculinos, vestíos imposibles y música con sones mizraxinos. Ye dicir, de los xudios que llegaron de los países del norte d'África, una minoria dientro d'un país gobernáu por xudíos askenazinos (d'orixe européu y principales validores del carácter occidentalizáu del Estáu). Equí canta en play-back un tema tituláu “Esto nun ye Europa”, poco más que dicir.

miércoles, 18 de enero de 2017

El secuestru de la nuestra memoria audiovisual


Esta semeya ye importante pa la historia de la cultura asturiana. Ye la rueda de prensa onde s'anunció'l primer Premiu Nacional de Lliteratura Asturiana. Pue vese como'l llar de l'ALLA ta enlleno de prensa. Puen vese los micros de les dos emisores de radio más escuchaes n'Asturies. Nun se ve'l de la televisión pública asturiana, qu'anque ye la xeneralista menos vista ye la que ta obligada por llei a custodiar la nuestra memoria audiovisual. La mesma televisión qu'impidió qu'estes imaxes quedaren recoyíes, en movimientu, pa la nuestra historia. 

La noticia foi "última hora" en tolos diarios del país, pero la televisión asturiana tuvo que tirar d'archivu y dar la nueva nun breve del so informativu. Cualquier televisión pública -rexonal, nacional, estatal o l'axetivu que se-y quiera dar-, abriría con esa noticia'l so informativu y incluiría na so web una biografía del autor xunto a una semeya bien grande del escritor, pa que tola sociedá supiera del premiu, de la importancia del autor y del prestixu del gallardón. Prestixu que, per otru llau, la cadena tendría qu'afalar y emponderar.

Con too, la nuestra televisión informó del primer Premiu Nacional de Lliteratura Asturiana con un breve. El presentador del informativu faló del fallu del xuráu y de la obra de Xuan Bello -que pa más aquel ye presentador de la cadena- mentes salíen imaxes d'archivu. Nun fixeron nin una pieza. Ye más, la noticia nin ta revoyida na web, onde si se fala de la presentación del documental d'una actriz madrilana en Llaviana, del conciertu de Raphael na Llaboral o del concursu de casadielles de Morcín. 

Probablemente, los que remanen na nuestra televisión -y radio- y munchos de los redactores, mui fieles al amu, nun se dieron cuenta de la repercusión del Premiu hasta que lo empezaron a ver en tolos medios. Y ye qu'ellos son un refexu del país qu'ellos mesmos (des)conocen. Ellos, que nunca sabrán señalar Paniceiros nel mapa. El país que permite informar a xente ensin formación. El país al qu'ellos nunca llamarán país.
P.D; Queda por ver si en mayu, como faería cualquier televisión pública, van grabar l'actu d'entrega y emitilo -y nun val con grabar unes imaxes pal noticieru, falo d'emitir l'actu-. Tamién queda por ver con qué van abrir esti 23 d'abril el so informativu y con qué van facelo esti 5 de mayu. Queda por ver... por desgracia, imaxino la respuesta...

miércoles, 4 de enero de 2017

Audiencies de les campanaes n'Asturies

Cadena Espectadores Share
La 1 91000 28,40%
Tele 5 85000 27,04%
Antena 3 63000 19,08%
La 1 (Campanaes Canaries) 62000 27,01%
TPA 20000 6,05%

Asturies foi ún de los territorios onde La 1 tuvo un share más baxu -nel conxuntu del Estáu algamó diez puntos más, un 38,8%-. Otra manera, el nuestru país, mui fiel a la telebasura, foi una de les poques autonomíes onde la patada nos coyones a un sieglu de feminismu el vestíu de La Pedroche nun s'impunxo a Tele 5, que nel restu del Estáu quedó nun 12,5%. Ye curioso, o penoso, que 62.000 asturianos quedaron con La 1 pa ver les campanaes dende Canaries, pero namás 20.000 compatriotes tomaron les uves con TPA. Sicasí, l'autonómica ameyoró los sos datos con esta retresmisión, porque xubió un puntu sobre la media del añu, que ye del 5%.

Nun tengo datos de LaSexta y Cuatro -qu'emitió les mesmes campanaes que Tele5-.

Otra manera, l'especial Fin d'añu de Cantadera convirtióse nel programa con más espectadores del día -25.000 y 9,1% de share-, namás superáu na cadena pola segunda edición del informativu -31.000 y 12%, únicu espaciu de TPA que pudo colase ente los 31 programes más vistos del día-.

martes, 3 de enero de 2017

En Miranda tamién puen ver "El Ministeriu del Tiempu"


Ayeri estrenaron la versión portuguesa d'El Ministerio del Tiempo. Ye un calcu del orixinal con menos presupuestu y con 15 minutos menos de metraxe. Sicasí, adapten l'argumentu a la historia del país. Si nel primer capítulu español los malos son un grupu de franceses de 1808 qu'intenten cambiar la historia d'España -que desaparecería como estáu independiente al ganar los galos la Guerra d'Independencia Española-, na versión portuguesa son un grupu de castellanos del sieglu XIV los que quieren que Portugal nun gane una batalla decisiva a Castiella. Ye dicir, quieren cambiar la historia y qu'esti reinu nun se consolidara como estáu independendiente, polo qu'España dominaría güei tola Península Ibérica -col permisu de Xibraltar y Andorra-. Al final ye'l mesmu argumentu; un vecín más grande y más poderosu qu'en dalgún momentu de la historia considérose superior y intento machacar al otru, ensin contar col arguyu nacional de los sos habitantes...

 Atención a los actores portugueses faciendo de castellanos.





Por cierto, falando de viaxes nel tiempu y de cambiar la historia, una pena nun tar nun país normal y qu'esto nun sía yá una película.

domingo, 4 de septiembre de 2016

Ai Xuanín, Ai Xuanina



Esta ye la versión portuguesa de las empanadillas de Mostoles de Martes y Trece. Y ye qu'un de los momentos más conocíos de la televisión portuguesa ye un sketch del programa Sabadabadu, onde s'interpreta'l cantar "Ai Agostinho, Ai Agostinha". Nesta escena, emitida a primeros de los ochenta, dos borrachos, los conocíos actores Camilo de Oliveira y Ivone Silva, canten una lletra sobre la complicada situación del país nesi momentu.



jueves, 7 de julio de 2016

Y hasta equí la emisión de güei



A finales del siglu XX, les televisiones del Estáu dexaron d'emitir carta d'axuste al pasar a tener programación 24 hores al día. Anque nun principiu pue parecer que supunxo más hores de televisión -o más hores con echadores de cartes y concursos de llama y gana (y tolo que tenga que ver con garrar el teléfonu y gastar perres)-, cola emisión 24 hores les cadenes perdieron ún de los sos tres principales símbolos identitarios -xunto col idioma y el mapa del tiempu-; l'empiezu y el cierre d'emisión. Y ye que dalgo tan simple foi una muestra de la situación sociopolítica del momentu. 



Por exemplu, el cierre d'emisión foi una muestra del cambiu democráticu; de mostrar imáxenes del dictador Francisco Franco, los símbolos de Falanxe y la bandera española col águila de San Xuan, les imáxenes qu’acompañaben al himnu d’España pasaron a mostrar al rei Xuan Carlos, la Constitución, la bandera democrática y el Príncipe d’Asturies, dalgo que mostraba la continuidá pal futuru del réxime monárquico-parllamentariu.



A semeyanza de TVE, cadenes como la gallega TVG, baxu un gobiernu del PP, o la vasca ETB incluyeron a lo llargo de los años imáxenes de la so bandera, instituciones y tradiciones mentes sonaba l’himnu autonómicu qu’anunciaba’l fin de la emisión.